Posted on

एक रविवार मराठी कवितेचा दर्जा आणि समृद्धी अनुभवण्यासाठी

0

नवे वर्ष… नवे कवी… नवा मुक्काम…

पुन्हा एकदा आपल्या भेटीला !
अष्टगंध प्रस्तुत

कवितेवर प्रेम करणाऱ्या प्रत्येकासाठी…

मु.पो.कविता

रविवार दिनांक २१ जानेवारी २०१८
सायं. ४ वाजता.

रवींद्र लघुनाट्यगृह, प्रभादेवी, दादर.

सत्र-१

अंकुश आरेकर, मकरंद सावंत
अरूण गवळी, अमेय घरत
संदीप पाटील, रत्नमाला शिंदे

सत्र-२

नारायण लाळे, सतीश दराडे
प्राजक्त देशमुख, गोविंद नाईक
ज्योत्स्ना राजपूत, अन्वर मिर्झा

◆ अष्टगंध प्रकाशित कवी अन्वर मिर्झा यांच्या
शेवटी कविताच राहते शिल्लक‘ काव्यसंग्रहाचे प्रकाशन.

निवेदक/सूत्रधार : संजय शिंदे

संपर्क : ९८९२ २७६८३१

देणगी प्रवेशिका : १०० रु.

(प्रयोगाच्या दिवशी सभागृहावर उपलब्ध)

◆ देणगीदार/जाहिरातदार/प्रायोजकांचे स्वागत.

◆ नक्की या… मराठी कवितेचा दर्जा आणि समृद्धी अनुभवण्यासाठी…

0
Posted on

संग्राह्य गझल विशेषांक !- संजय शिंदे

0

 

गझल अभ्यासक व समीक्षक अरुणोदय भाटकर यांनी संपादित केलेला रत्नागिरी एक्सप्रेसचा दीपावली गझल विशेषांक वाचणे ही एक मोठी पर्वणी आहे. या अंकात साधारणपणे जुन्या-नव्या/प्रस्थापित-नवोदित अशा जवळपास शंभर गझलकारांच्या एकूण तीनशे ते चारशे रचना समाविष्ट केलेल्या आहेत.

गझलांची निवड व संपादन स्वतः अरुणोदय भाटकर यांनी केल्यामुळे गझलांच्या दर्जाबद्दल अजिबात शंका नाही. शिवाय या गझला महाराष्ट्रातील विविध प्रदेशात असणाऱ्या गझलकारांच्या असल्यामुळे या सर्वच गझलांमध्ये आशय, विचार व मांडणी यानुसार असणारी वैविध्यता इथे अनुभवायला मिळते.

या संग्रहात जशा तीस-पस्तीस वर्षं गझललेखन करणाऱ्या गझलकारांच्या रचना आहेत तशाच अगदी नवोदित असणाऱ्या गझलकारांच्याही गझला आहेत. त्यामुळे या अंकाचं संग्राह्य मूल्य निश्चितच वाढलं आहे.

मालवणी गझला, अनुवादित गझला, कोकणी गझला, अमराठी कवींच्या मराठी गझला हे विभाग या अंकाचं वेगळेपण अधोरेखित करतात. तर गझलचिकित्सा या विशेष भागातील काही लेख मराठी-उर्दू गझलेविषयी सविस्तर विचारमंथन घडवून आणतात. या भागातील सर्वच लेख विशेषतः वैवकू यांचा मराठी गझलेच्या आकृतीबंधाबाबतचा लेख नवोदित गझल लिहिणाऱ्यांना मार्गदर्शन करणारा आहे.

याशिवाय संदीप गुप्ते, शिल्पा देशपांडे, जयदीप जोशी, स्वतः अरुणोदय भाटकर, चित्तरंजन भट यांचा संक्षिप्त लेख हे सर्वच लेख वाचनानंद देणारे आहेत. मला मिळालेल्या अंकात स्वप्निल शेवडे यांचा लेखच काही तांत्रिक कारणाने अगदी थोडा छापला गेलेला आहे. या विभागात गझल या विषयावरील अजून चिंतनात्मक, चर्चात्मक, तुलनात्मक, समीक्षात्मक लेख असते तर वाचकांना गझलरचनांच्या आनंदासोबतच अजून मोठी वैचारिक मेजवानी मिळाली असती.

अंकाचे मुखपृष्ठ नंदू गवांदे यांचे असून ते अंकाच्या सौंदर्यात भर घालणारे आहे. या अंकाचे आणखी एक वैशिष्ट्य म्हणजे हा संपूर्ण अंक आर्ट पेपरवर मुद्रित केल्याने अंकाचा छपाईचा दर्जा उत्तम आहे. फक्त मांडणीत व विशेषतः अक्षरजुळणीत काही त्रुटी राहिल्या आहेत. वेलांटी व उकाराच्या चुका राहिल्या आहेत. त्यामुळे अंक वाचताना रसभंग होतो. या चुका संपादनातल्या नाहीत, तांत्रिक आहेत. पण तरी त्या टाळल्या असत्या तर अंकाचा दर्जा निश्चितच अजून उंचावला असता यात शंका नाही.

मराठी साहित्यात विशेषतः काव्यक्षेत्रात सध्या सर्वांचे लक्ष वेधून घेणाऱ्या गझल या काव्यप्रकारावर हा विशेषांक काढल्याबद्दल संपादिका नमिता कीर व अतिथी संपादक अरुणोदय भाटकर यांचे अभिनंदन करणे महत्वाचे आहे.

गझलगाथा या नावाने या सर्व गझलांचा एकत्रित असा एक नवा ग्रंथ येतो आहे असे अरुणोदय भाटकर यांनीच कळवले. तसे झाल्यास येणारा गझलगाथा हा ग्रंथ गझल रसिकांसाठी अविस्मरणीय ठरेल यात अजिबातच शंका नाही !
तूर्तास, या अंकासाठी अरुणोदय भाटकर यांचे मनःपूर्वक अभिनंदन व पुढील गझलगाथा ग्रंथासाठी शुभेच्छा !

अंकासाठी संपर्क :

Arunoday Bhatkar :
98191 54411

 

Continue reading संग्राह्य गझल विशेषांक !- संजय शिंदे

0
Posted on

मु.पो.कविता… कवितेवर प्रेम करणाऱ्या प्रत्येकासाठी !

1+

कविता हा तसा प्रत्येक मराठी माणसाच्या जिव्हाळ्याचा विषय. म्हणूनच कवींना मानसन्मान देणं, कविसंमेलनाला गर्दी करणं, मनमुराद दाद देणं हे मराठी साहित्यक्षेत्रात नवीन नाही. कविता लिहिणं व लिखित-मौखिक माध्यमातून ती रसिकांपर्यंत पोहोचवणं हे मराठी साहित्यात गेली अनेक वर्षं घडतंय. 

कवी मंगेश पाडगावकर, विंदा करंदीकर आणि वसंत बापट या त्रिकुटाने खऱ्या अर्थाने महाराष्ट्रभर काव्यवाचनाचे कार्यक्रम करून मराठी कविता सर्वदूर पोहोचवली. त्यानंतरच्या पिढीतही अरुण म्हात्रे, अशोक बागवे, सौमित्र, नलेश पाटील, अशोक नायगावकर यांनी कवितावाचनाचे अनेक कार्यक्रम केले.



मराठी काव्यवाचनाची हीच परंपरा पुढे नेण्याच्या हेतूने पेशाने शिक्षक व कवी असणाऱ्या संजय शिंदे यांनी आपल्या काही तरुण मित्रांना सोबत घेऊन दोन वर्षांपूर्वी अष्टगंध ही कला संस्था स्थापन केली आणि मु.पो.कविता नावाचा काव्यवाचनाचा एक आगळावेगळा कार्यक्रम मराठी रसिकांसमोर आणला.
मराठी कवितेतले वेगवेगळे काव्यप्रकार, वेगवेगळ्या आशयाची कविता, जुन्या-नव्या पिढीच्या दर्जेदार कविता रसिकांपर्यंत पोहोचवण्याचे उद्दीष्ट साध्य करत मु.पो.कविता कार्यक्रमाचे आजवर एकूण १३ प्रयोग झाले. आजवर एकूण ६५ कवींनी मु.पो.कविता कार्यक्रमातून आपल्या विविधांगी कविता सादर केल्या. या कवींमध्ये सतीश सोळांकुरकर, संजय चौधरी, प्रसाद कुलकर्णी, भगवान निळे, अन्वर मिर्जा, संगीता अरबुने, अनुराधा नेरुरकर, योगिनी राऊळ, छाया कोरगावकर, भाव सुधा, रेश्मा कारखानीस, सुधीर मुळीक, प्रशांत वैद्य, गोविंद नाईक, गणवेश नागवडे, सदानंद बेंद्रे, जनार्दन म्हात्रे, मंदार चोळकर, समीर सावंत, सतीश दराडे,सायमन मार्टिन, साहेबराव ठाणगे, गणेश नागवडे, जयदीप जोशी, प्राजक्त देशमुख, वैभव देशमुख, आनंद पेंढारकर, हेमंत राजाराम, अशा दिग्गज कवींचा समावेश आहे.
बदलत्या काळाची स्पंदने अचूकपणे टीपणाऱ्या तरुण पिढीतील गजानन मिटके, पंकज दळवी, प्रथमेश पाठक, जयेश पवार, गीतेश शिंदे, सचिन काकडे, विजय बेंद्रे, प्रवीण खांबल, उमेश जाधव, गुरुप्रसाद जाधव, अमोल शिंदे, केतन पटवर्धन, यामिनी दळवी, शिल्पा देशपांडे, पूजा भडांगे, स्वाती शुक्ल, पूजा फाटे, राधिका फराटे, प्रथमेश तुंगावकर, विजय उतेकर, आकाश सावंत, शशिकांत कोळी, बंडू अंधेरे, सूरज उतेकर, आनंद रघुनाथ, जितेंद्र लाड, विशाल राजगुरू, सुशांत खुरसाळे, सत्यजित पाटिल, श्रीपाद जोशी, प्रशांत केंदळे, भालचंद्र भूतकर यांनीही मु.पो.कविता कार्यक्रमात आपल्या कविता सादर केल्या आहेत.


आज मराठीत अनेक कवीसंमेलने होतात. पण कवी, त्यांच्या कविता, कार्यक्रमाची बांधणी, सजावट या बाबतीत या संमेलनांकडे गंभीरपणे पाहिले जात नाही. कवीला अत्यंत शांत वातावरणात, तन्मयतेनेे स्वतःची कविता सादर करता यावी व रसिकांना तितक्याच तन्मयतेने, एकाग्रतेने तिचा आस्वाद घेता यावा या उद्देशाने कार्यक्रमाचा दर्जा टिकवण्याचं आव्हान मु.पो.कविता या कार्यक्रमाने गेल्या १३ प्रयोगापर्यंत लीलया पेललेलं आहे.
जयेश पवार, रोहन कोळी, प्रवीण लोहार, विशाल पाटिल, अभिजीत तर्फे, सुभाष पवार, सुधीर मुळीक, अभिजीत डोंगरे, शिवकुमार, मनोज, विजय, अमोल या टीमने आजवर या कार्यक्रमाचं नेपथ्य, प्रकाशयोजना, छायाचित्रण व दर्जा उंचावण्याच्या दृष्टीने आवश्यक असलेली सर्व जबाबदारी आत्मीयतेने सांभाळली आहे .


कविसंमेलनाच्या इतर कार्यक्रमासारखा एकसूरीपणा या संमेलनाला येवू नये व वेगवेगळ्या स्वरूपात मराठीतली दर्जेदार कविता रसिकांपर्यंत न्यावी यासाठी संस्थेने ‘कविता लोभसवाणी’ व ‘एका कवीच्या दुःखाचे भाषांतर’ हे दोन वेगळे कार्यक्रम केले. कविवर्य अशोक बागवे, नाटककार प्रेमानंद गज्वी, कवी किशोर पाठक हे मान्यवर या कार्यक्रमाला उपस्थित होते.
मु.पो.कविताच्या सर्व कार्यक्रमाचे निवेदन ही संकल्पना ज्यांना सुचली ते कवी संजय शिंदे स्वतः करतात. सर्व कवींचा परिचय देऊन, त्या कवींच्या कवितांचे काही निवडक, प्रभावी तुकडे सादर करत अत्यंत दिलखुलासपणे संजय शिंदे या कार्यक्रमाचं निवेदन करतात.
मु.पो.कविताने इथून पुढेही रसिकांना कवितेची मेजवानी सातत्याने देत राहावी हीच सदिच्छा !!

1+