Posted on

#मी टू

0

#मीटू या मोहिमे अंतर्गत अनेक लोकांचे पितळ उघडे पडत आहे. बॉलिवूड हे सदैव वादात अडकले आहे. मुळात आपण ज्यांना चरित्र अभिनेता अथवा हिरो म्हणतो, तेच या अन्यायाचे काळे भागीदार आहेत. स्त्री व पुरुष खांद्याला खांदा लावून काम करतायेत. सर्वदूर तिच्या कामाचा धडाका आहे. सर्वदूर तिचे कौतुक आहे. पण पुरुषप्रधान संस्कृती आणि वासनांध नजरा ह्यापासुन तिची सुटका केली गेलेली नाही. ह्यातच समाजाचे अपयश आहे. स्त्री वर असलेला ताबा आणि तिने आपलेच ऐकावे हा अट्टाहास म्हणजे एक प्रकारचा पुरुषी अहंकार आहेच.

पण हे सगळे घडण्याला कारणीभूत काय आहे? इतके कठोर कायदे असूनसुद्धा असे का व्हावे?
आपल्या समाजाचा तिच्याकडे पाहण्याचा दृष्टिकोन काय ? आपले संस्कार एक आणि आचरण वेगळे असे का ?.
समाज आणि समाजमाध्यमे ज्यात आपण आणि तमाम दृकश्राव्य गोष्टी सिनेमा, टीव्ही, जाहिराती आणि तत्सम बाबी येतात यांतून स्त्रीयांना ज्या पद्धतीने दाखविले जाते व आवडीने पाहिले जाते. आणि हाच हिणकस विचार समस्त स्त्रीवर्गाला लागलेला अभिशाप आहे.
सिनेमा आणि नाटकक्षेत्रात उतरायचे असेल किंवा एखाद्या संस्थेत, व्यवहारिक जीवनात पुढे जायचे असेल तर तिची आधी मानसिक आणि शारीरिक पिळवणुक केली जाते. यापेक्षा सामजिक दळभद्रीपणा कोणता. मग जी लोकं अशी पिळवणूक करतात त्यांच्यात आणि जनावरात काय फरक आहे? तुरळक अपवाद वगळता बहुतांशी सिनेजगतात अशी नामांकित, सुशिक्षित आणि बडेजाव करणारे समाजसेवक या प्रकारातील जनावरे आहे. आणि या टोळक्यामुळेच या क्षेत्रात जाणाऱ्या स्त्रियांना सहमती आणि असहमतीशिवाय अनेक गोष्टी कराव्या लागत आहेत. तनूश्री ने जो मुद्दा उचलला आहे त्याला ज्या पद्धतीने बळ मिळाले आणि अनेक वर्षांची घुसमट बाहेर पडली, त्यामुळे या प्रश्नाची व्याप्ती आणि गांभीर्य लक्षात घेण्यासारखी आहे.
आणि समाजाच्या विचित्र वागण्यानुसार, नुसते दिखाव्याला का होईना समाज स्त्रियांची बाजू घेत असतो.
त्यामुळे स्त्रियांचा विकास होऊनसुद्धा स्त्री जातीला आपल्या बंधनात ठेऊन घेण्याचा प्रकार पुरुष वर्गाकडून केला जातो. व पुरुषवर्गाचा तिटकारा म्हणून स्त्री ही नेहमीच आपली भूमिका कठोर निर्णयात रुपांतरीत करते. मग या कठोर वर्तनात वा निर्णयात सुसंस्कृत पुरुषवर्ग सुद्धा होरपळतो. पुरुषप्रधान संस्कृतीत स्त्री वर्गाची ससेहोलपट होतेच. स्त्री जीवनाचा संघर्ष ते तिचा विकास इथपर्यंत सर्व गोष्टी योग्य आहेत पण करिअर या नावाखाली समाजाने तिची जी दुरावस्था केली आहे, ती अत्यंत वाईट आहे.
“स्त्री व पुरुष ही रथाची दोन चाकं आहेत. दोन्हींचा विकास झाला तरच आयुष्य सुरळीत होईल.”
“तिचा मान राखला गेला तरच सुसंकृत पिढी निर्माण होईल”

प्रविण शांताराम
www.pravinshantaram.com

0